Merkataritzako hondakinen baliotze sortzailea

Proiektu hau Arrasateko udalerrian garatu da, IBAIARTE merkatarien elkartearekin lankidetzan, bere jardueren ingurumen-jasangarritasunarekiko konpromisoa erakutsiz eta proiektu osoan zehar modu aktiboan parte hartuz.

Tokiko merkataritza-jardueratik sortutako hondakinek udalerrian sortutako hondakinen zati esanguratsu bat osatzen dute, eta kudeaketa hobetzeko eta optimizatzeko aukera argia dagoela egiaztatu da, lotutako ingurumen-inpaktuak murrizten lagunduz.

Lehenengo urratsa tokiko saltokietatik datozen hondakinak aztertzea eta ezaugarritzea izan da, bisitak eginez eta laginak bilduz, saltoki mota bakoitzak sortzen dituen frakzioen ezaugarriak, materialak, kantitateak, formatuak, garbiketa-egoera eta egungo kudeaketa-sistema ezagutzeko.

Egindako azterketaren ondoren, zenbait material berreskuratzeko aukera identifikatu da, hala nola esekitokiak eta plastikozko kutxak, PP eta PSn eginak eta gainerako edukiontzian edo garbigunean utzita. Hondakin plastiko horiek beste material batzuekin nahasteko arrisku handia dute, eta horrek birziklatzeko ahalmena zailtzen du.

Material bakoitzetik sorta txikiak bildu ondoren, birziklagarritasun- eta prozesagarritasun-potentziala aztertzeko, mekanikoki birrindu dira pikortak lortzeko eta laginak egin dira, fabrikazio gehigarriko ekipoak erabiliz prozesatzeko bideragarritasuna baliozkotzeko.

Proiektuak merkatariek erabiliko dituzten hainbat produkturen ekodiseinua barne hartu du, berreskuratutako materialen zirkulartasuna itxiz. Garatutako produktuen erreferentzien artean merkataritza-sustapeneko elementuak daude, merkatarien bezeroak udalerriko ingurumen-jasangarritasunaren garrantziaren inguruan kontzientziatzeko.

Proposatutako hainbat irtenbide prototipatu dira, eta sustapen-artikulu sorta txikien tokiko fabrikazioa baloratzen ari dira, merkatarien elkarteak abian jarri nahi duen ingurumen-kontzientziazioko kanpaina baten babesean.